Peire Vidal (364.3)

		Peire Vidal
		Amors, pres sui de la bera,
		quar m’es tan de mala guiza;
		qu’ieu cugei m’acsetz conquiza
		la gensor e la plus gaia
5		del mon, mas no·us platz qu’ieu l’aya.
		Per qu’ieu morrai dezesperatz,
		Amors, et er tortz e pechatz,
		si d’aquest vostre benvolen
		non avetz qualque chauzimen.

10		Ja s’ieu saupes, non amera,
		que m’en prezes d’aital guiza,
		qu’er a ma voluntat priza
		cilh qu’es orgulhoz’e gaia
		vas mi, e de mal qu’ieu·n traya,
15		no·lh cal, ans m’a mes en tal latz,
		que jois ni deportz ni solatz
		d’autra no·m don’esbaudimen,
		ni de leis nulh joi non aten.

		Per qu’ieu ab mon grat m’estera,
20		fe que·us dei, ans de ma guiza,
		qu’enquers non l’agra enquiza:
		e pero non es tan gaia,
		qu’ieu de lieis mal non retraia,
		e dir n’ai enueitz e viltatz,
25		sitot s’es messong’e foldatz,
		quar cors qu’es ples d’airamen
		fai ben falhir boca soven.

		Qu’ieu vi ja l’ora qu’ilh era
		francha e de bona guiza
30		e sa boca gent apriza
		en parlar paraula gaia,
		vas bon pretz fin’e veraia,
		sos cors adregz e gen formatz
		d’ensenhamens e de beutatz,
35		que anc nuls hom non vi tan gen
		ni ab tan bell captenemen.

		Mas ar m’es esquiv’e fera
		tornad’e de brava guiza,
		per que l’esperansa·s briza,
40		don fo ma voluntatz gaia.
		Pus no·lh platz bes m’en eschaia,
		pieitz trac de mort, tant viu iratz.
		Ar sai e conosc qu’es vertatz,
		que diable son siei paren,
45		qu’als sieus dona peior turmen.

		Tostemps, si·m legues, blasmera
		lieis que non es d’avol guiza;
		mainhta messonj’ai asiza
		en blasmar la domna gaia.
50		Per qu’es razos qu’ueimais taia.
		Mout mi part de s’amor forsatz;
		e pus conosc que tan li platz,
		sivals partrai m’en bonamen
		et irai mon mielhs enqueren.