I.

1. «Estornel, cueill ta volada; [Siutor]
2. dema, ab la matinada,
3. iras me en un’encontrada
4. on cuge aver amia.
5. Trobaras
6. e veiras
7. per que vas;
8. comtar l’as
9. e·ill diras
10. en eis pas
11. per qu’es tras[a]lia.

II.

12. No sai s’aisi·s fo fadada
13. que no m’am e si’amada,
14. c’ab una sola veguada
15. fora grans la matinada; [R]
16. si·ll plagues
17. ni volgues
18. c’o fezes,
19. per un mes
20. n’agra tres
21. aqui eis [R]
22. de sa companhia».

III.

23. «Ai, com es encabalada [Marcabru]
24. la falsa razos daurada
25. «Denan totas vai triada!»
26. Va, ben es fols qui s’i fia.
27. De sos datz
28. c’a plombatz
29. vos gardatz,
30. qu’enguanatz
31. n’a assatz,
32. so sapchatz,
33. e mes en la via.

IV.

34. Per semblant es veziada
35. plus que veilla volps cassada.
36. L’autrier mi fes far la bada
37. tota nueg entruesc’al dia.
38. Sos talans
39. es volans
40. ab enguans,
41. mas us chans
42. fa·n enfans,
43. castians
44. de lur felonia».

V.

45. «Selui fadet gentils fada [Siutor]
46. a cui fo s’amors donada!
47. No fo tals crestianada
48. de sai lo peiro Elia!
49. Vol’e vai
50. juesca lai,
51. e·l retrai
52. qu’ieu morrai,
53. si no sai
54. consi jai,
55. nuda ho vestia!»

VI.

56. «Sa beutatz fo ab leis nada, [Marcabru]
57. ses fum de creis ni d’erbada . . .
58. De mil amicx es cazada,
59. e de mil senhors amia.
60. Marcabrus
61. ditz que l’us
62. no·n es clus;
63. bada mus,
64. qui·ll vol plus,
65. c’a raüs
66. part de la frai[di]a».

VII.

67. «De fin’amor dezirada [Siutor]
68. a una flor pic–vairada
69. plus qued autruna pauzada.
70. Paucx fuecx fai tost gran folia!
71. Perdo·l grat
72. del abat
73. Saint Privat;
74. m’ai pensat
75. ses cujat,
76. si·m ditz “Mat”,
77. qu’el’amors enbria!

VIII.

78. Del deslei
79. que m’[en] fei
80. li fauc drei
81. e·ill m’autrei,
82. mas sotz mei
83. aplat sei,
84. qu’ela·m las’e·m lia».