I.

1. Er [se] sebro·ill foill del fraisse
2. e·[il]l ram s’entressenha[n] el som,
3. que per la rusca no·i poia
4. la dolz’umors de la saba,
5. e·ill aucel son de cisclar mut
6. pel freit que par que·ls destrenga:
7. mas ges per aisso no·m remut
8. que·l cor no·m traia fait de drut.

II.

9. Qu’eu reverdisc et engraisse
10. quan tot’altr’alegressa rom,
11. e si tot mos gauz s’enoia
12. a tal c’a prezen non gaba,
13. ges per tant non es remanzut
14. qu’ab lei de cui teing Aurenga
15. no m’aion tan mei prec valgut
16. qu’ab si m’a baizan retengut.

III.

17. Per qu’ieu lau c’us quecs s’en laisse
18. pos malgrat lor n’ai mais del nom:
19. que ni gels ni vens ni ploia,
20. si sa grans merces m’acaba
21. mon car desir qu’ai tan volgut,
22. non pot tolre, ni lauzenga,
23. l’amor que·i mes ab gran vertut
24. Deus que aisi m’ac elegut.

IV.

25. Ha, domna! si ja·m biaisse
26. ves vos ni pren vouta ni tom,
27. sia eu pres en boia!
28. si a tan mos cors m’escaba,
29. qu’al meu tort me virez l’escut!
30. e cofonda Deus la lenga
31. que diz a frau ni a saubut
32. re per qu’amdui siam vencut.

V.

33. Qu’eu non voill que de nos baisse
34. l’amors, que ges del dart de plom
35. no·ns feri, ans sai que voia
36. de nos tot mal et araba,
37. que anc, e deu esser crezut,
38. doas res, qui que s’en fenga,
39. no s’ameron, si Deus m’aiut,
40. cum nos fam e farem canut.

VI.

41. Ai, dona! quar tan m’abaisse
42. que no·us vei lai on essems fom,
43. no creiatz que molt non coia;
44. mas per dig d’una sillaba
45. er mantenen reconogut
46. tot so qu’ad amor covenga,
47. per qu’ieu del ben que n’agr’agut
48. sai e cre que n’ai molt perdut.

VII.

49. Ja trobaire no s[’es]laisse,
50. qu’anc, pos Adams manget del pom,
51. no valc, si tot quecs s’enbroia,
52. lo seus trobars una raba
53. ves lo meu que m’a ereubut;
54. ni taing qu’us tan aut s’enprenga,
55. qu’eu ai trobat e cossegut
56. lo meils d’amor, tant l’ai quesut.

VIII.

57. E qui m’en desmen tost prenga
58. lo bran e la lans’e l’escut,
59. qu’eu l’en rendrai mort e vencut.