Guiraut Riquier

Lo XV [= 14°] vers d’en Gr. Riquier, l’an MCCLXXXIII, en decembre.

Mentaugutz

auch que Dieus es

e crezutz

que de totz bes

5

es la lutz,

e que·l mon fes,

e que nutz

per nos mort pres,

e del vas

ressors de mort,

per qu’estort

son e seran peneden

tuch li veray peneden.

Mas tan len

es bes volgutz,

e corren

mals es saubutz,

qu’en parven

non es temsutz

Dieus, que ren

meritz degutz.

So es mes

denant detras,

per qu’em ras

de dreg cami e de port

e perillam ab deport.

Qu’om fa tort

dreg conoyssen,

per que port

autruy soven

a vil sort,

lo sieu perden;

e·l pus fort

son pus arden,

per qu’es brutz

qu’amors ni fes

ni merces

no son, q’usquecx a mal pas,

per que venem a mal pas.

Doncx tu, las,

senes acort,

que·t faras?

Aias recort

que trop as

estat el ort

ez auras

so que·t remort

fach ab sen.

No sias mutz

quon avutz

yest de ben; cofes, repres,

fai que no sias repres.

Dieus cortes

que vols e fas

drech, qu’iest ples

de gauch, a bras

pren nostres

faitz non d’a pas;

del sotzmes

vil loc trop bas

ses conort,

totz bes fazen,

nos defen

Senher, e lai nos perdutz,

on non es lunhs bes perdutz.

Belh Deport

ayc mout valen

e plazen,

e no·l puesc mandar salutz;

mas Dieus li sia salutz.

Per saber suy esperdutz,

quar vey que tant es perdutz.