Guillem de la Tor (236.6)

		Guillem de la Tor
		Quant hom regna vas cellui falsament
		qi l’honra e·l serf e l’ama finament
		ses trahiment,
		per peichs o deu tener
5		de lui qe d’autre, qui vol dir lo ver.
		Per qe? car cel en cui hom plus se fia,
		ses fadia,
		pot meilz l’om enganar
		qe cel de cui hom sap qe·s deu gardar.

10		Per q’eu o teing plus a mal aissament
		a la falsa non feira az autras cent
		del failliment
		qe·m fez, c’ab ferm voler
		la servia e de tot mon poder;
15		pero nulz hom tant servir non poiria
		s’el servia
		malvatz seignor avar,
		qe ja·n pogues bon gazardon cobrar.

		Per q’eu mi part ses tot atendement
20		de s’amistat, qe no n’ai plus talent;
		e si m’entent
		en tal q’al meu parer
		de sa ricor non pot nulz hom saber
		meillor de lei ni ab plus cortezia
25		ne qui sia
		plus d’avinent afar
		ni mielz sapcha rire ni gent parlar.

		Ni ges non cre, segont qe m’es parvent,
		q’om sapcha el mont plus bella ren vivent
30		ni qe plus gent
		sapcha prez mantener;
		e si m’a dit q’eu aia bon esper
		el seu ric joi e qe l’am ses bausia
		tota via,
35		car, si ben o sai far,
		bon chausiment poirai ab lei trobar.

		E pos li plaz qu’eu aia entendiment
		el seu bel cors amoros e plaçent,
		tant fermament
40		m’a tot al seu plazer
		q’autra del mont no·m pot mais retener:
		q’amors m’a mes, qui·m ten per lei e·m lia,
		en tal via,
		c’un jorn me fai penssar
45		et un autre me fai rire e chantar.